छोराछोरीको भोको पेट भर्न ‘ढुंगा’ नै पकाउने अवस्थामा पुगेपछि यी महिला !
एजेन्सी- ‘ढुंगाको खिचडी’ कथा तपाईंहरु सबैलाई थाहा होला । एउटा लोभी बुढीलाई एउटा चलाख बटुवाले ढुंगाको खिचडी पकाउछु भनेर एक-एक सामग्री माग्छ र खिचडी पकाएर खान्छ।
यो त एउटा कथा थियो- ढुंगाको खिचडी पकाएको । तर, केन्यामा एक महिलाले छोराछोरीको भोको पेट भर्न वास्तविकतामै ढुंगा पकाएको समाचार सामाजिक सञ्जालमा भाइरल बनेको छ ।
कोरोना भाइरसको महामारीका कारण कामधन्दा ठप्प भएपछि छोराछोरीको भोको पेट भर्न उनले ‘ढुंगा’ पकाएको जनाइएको छ ।
पेनिना बहाती कित्साओ नामकी विधवा महिला ८ बच्चाकी आमा हुन् । उनी अन्य मानिसको घरमा गएर कपडा धोएर आफ्ना बच्चाहरुलाई पाल्दै आएकी थिइन् ।
उनले भनिन्, ‘लकडाउनले गर्दा सबै काम ठप्प भयो, घरमा खानेकुरा सबै सकियो । विकल्पमा पकाउन बाँकी चिज ढंगा मात्र भेटेँ ।’
घरमा खानेकुरा केही नभएपछि छोराछोरीलाई फकाउनको लागि उनले भाँडोमा ढुङ्गा राखेर उमालेकी हुन् । छिमेकी प्रिस्का मोमानीले पूरा घटनाको भिडियो बनाएर सामाजिक सञ्जालमा पोस्ट गरेपछि खबर चारैतिर फैलिएको हो ।
प्रिस्काले बच्चाहरु रोएको खबर सुनेर त्यहाँ जाँदा उक्त घटना भएको देखेकी थिइन् । उनको अवस्थाबारे थाहा पाएपछि उनलाई सहयोग गर्नेहरु पनि बढेको जनाइएको छ ।
उनको छिमेकीहरुले बैंक अकाउण्ट खोलिदिएपछि उनलाई बैंक अकाउण्टमा सहयोग प्राप्त हुन थालेको जनाइएको छ ।
